Hindi naman kita pinapili
Kung vans o adidas
Kung maalat o matamis
Kung bundok o tabing-dagat
Kung Pilipinas o diyan
Alam kong kanan ang bituka mo.

Hindi rin kita pinapili
Kung gig o sine
Kung leche flan o roll cake
Kung Blackpink o 2NE1
Kung ilalim o ibabaw
Alam kong kaliwa't kanan ka rito

Minsan kailangan nga lang pumili.

Ngunit hindi naman kita pinapili
Kung ako o larangan mo
Kung ako o kaibigan mo
Kung ako o pamilya mo
Pinapili kita kung ako o wala ako
At alam kong kanan ang bituka mo

Kung ako pagpipiliin
Sana Vans  kaysa adidas
Sana Maalat kaysa matamis
Sana Bundok kaysa tabing-dagat
Sana Pilipinas kaysa diyan
Pero pinili ko kung nasaan ang bituka mo

Kasi kung pwede namang piliin
Ako at larangan mo
Ako at kaibigan mo
Ako at pamilya mo
Bakit pinili mo na walang ako
Kahit araw-araw kitang pinipili

Ngunit hindi naman kita pinapili.